Talofa Samoa i lau tapuaiga i lenei itula o le aso

Ou te manatu o ou paia sausaugatā ma ou sā le avea o le ā taoama pea ia aua e le mafai ona suia e sa matou fa'amatalaga. Ae avea ia lenei laolao e faatalofa atu ai i Tinā uma i soo se tafa o Samoa nei faapea le lalolagi atoa o loo mafai ona maua mai ai lenei faasalalauga. Malo le tautua, faamalo foi le tauata'i. E le faagaloina foi le tapuaiga leleoa a nai o tatou Tinā matutua ma matua tausi o lo'o anapogi ma tatalo i aso uma o lo'o manuia ai faiva o ana tama fanau. Faafetai le fai tama lelei.

O lenei tausaga e atoa i ai le 20 tausaga talu ona faamanatu e lo tatou Malo le Aso Faapitoa mo Tinā ma lona Manulauti: "O LE MATOFI O FAUSAGA MAU"

A faamatala lenei autu i lona gagana faigofie, o ni vaega iti ua tapena lelei e fausia ai se meatotino anagata e faaaogaina i taimi lelei ma taimi e a'afia ai i faigata. Ua faatusaina lea i se galuega iti a Tinā sa lelei tapena ma mautu lona faatinoina lea ua aeae ai Samoa e le gata i taimi o sologa lelei ae e tua foi i ai i taimi e fesouāina ai i faigata. Tinā, o outou o le afa e fusia ma fa'amaopoopo i le alofa aiga ma so'o se fa'alapotopotoga. E tele na le amanaia ma tusiesea outou. Ae o le upu moni, o fausaga sa outou fausia ma o lo'o faaauau pea ona outou tapenaina, o lo'o maopoopo ma manuia ai aiga, nu'u, o le Malo faapea Ekalesia.

Faafetai i le Atua ona o outou. O outou o le ola. E le atoa se aiga pe a outou le iai. Tinā ae o Samoa, o lea ua futifuti manu'ula lo outou fita taupale, ua auau malie la outou afa ponapona ma ua le ititi foi la outou faasao ia Manuvao. Ua malie o, ua malie malo. Saō faalalelei.

E avea ai a'u ma sui o la tatou Matagaluega, (Matagaluega o Tinā ma Tama'ita'i, Atina'e o Afioaga ma Agafeso'ota'i) faatasi ai ma pa'aga uma, matou te ofo alofa atu ai i Tinā ma Tama'ita'i uma lava o Samoa nei ma isi atunu'u lo latou Aso Faapitoa o lenei tausaga.

Ia faamanuia tele le Atua i so'o se tafa o le soifua vala'auina o lo'o outou tautua ai aua se manuia lautele o lo tatou atunu'u.

Soifua ma ia Manuia